സൌമ്യ എന്ന പാവം പെണ്‍കുട്ടി ദാരുണമായി കൊല്ലപ്പെട്ടിട്ടു ഒരു വര്ഷം കഴിഞ്ഞു. കേരള മനസ്സാക്ഷിയെ പിടിച്ചു കുലുക്കിയ ആ സംഭവം മിക്കവാറും എല്ലാവരുടെയും മനസ്സില്‍ ഇപ്പോഴും നീറി കിടപ്പുണ്ടാവണം. കൊലയാളിക്ക് തൂക്കുകയര്‍ വളരെ വേഗം തന്നെ കിട്ടി, നല്ല കാര്യം. എന്നാല്‍ എന്ത് മാറി? ഒന്നും മാറിയിട്ടില്ല. ആക്രമണങ്ങള്‍ തുടര്‍ന്നുകൊണ്ടിരിക്കുന്നു. കഴിഞ്ഞ ദിവസങ്ങളില്‍ എറണാകുളം – ട്രിച്ചി ടീ ഗാര്‍ഡന്‍ എക്സ്പ്രസ്സിലെ റിസെര്‍വേഷന്‍ സ്ലീപ്പര്‍ കോച്ചില്‍ ഉറങ്ങിക്കിടന്ന പെണ്‍കുട്ടിയെ, ടിക്കറ്റ്‌ ഇല്ലാതെ അതിക്രമിച്ചു കയറിയ മധ്യപന്‍ ആക്ക്രമിക്കാന്‍ ശ്രമിച്ചു. പിന്നെ പട്ടാപ്പകല്‍ കോട്ടയം – എറണാകുളം റൂട്ടില്‍ കുറുപ്പന്തറയില്‍ വച്ച് തിങ്ങി നിറഞ്ഞ ലേഡീസ് കമ്പാര്‍ട്ട് മെന്റില്‍ ഒരാള്‍ ആക്രമം നടത്തി, 5 പെണ്‍കുട്ടികള്‍ക്ക് പരുക്കേറ്റു. എന്താണ്  ഇത്? എന്തുകൊണ്ടാണ് സൌമ്യകള്‍ ആവര്‍ത്തിക്കുന്നത്? ആരാണ് യഥാര്‍ത്ഥ കുറ്റവാളി?

കുറേകാലമായി വാദ പ്രതിവാദങ്ങളും തര്‍ക്കങ്ങളും ഇത് പോലെയുള്ള സംഭവങ്ങള്‍ ആവര്‍ത്തിക്കാതിരിക്കാന്‍ നടത്തേണ്ട പരിഷ്കാരങ്ങളും എല്ലാം ഒരുപാട് കേട്ടു. ലേഡീസ് കമ്പാര്‍ട്ട് മെന്റ് ട്രെയിനിന്റെ നടുവില്‍ സ്ഥാപിക്കുക, മുന്‍പില്‍ സ്ഥാപിക്കുക, സായുധരായ പോലീസുകാരെ സുരക്ഷക്കായി നിയമിക്കുക, പിന്നെ ഏതോ ചാനലില്‍ ഒരു കൊച്ചമ്മയുടെ “ലേഡീസ് കമ്പാര്‍ട്ട് മെന്റിന് പിങ്ക് നിറം അടിക്കുക!” എന്ന വിപ്ലവാത്മകമായ തിരുമണ്ടന്‍ നിര്‍ദേശം എന്നിങ്ങനെ പലതും. (ചിലപ്പോള്‍ പിങ്ക് നിറം കണ്ടു Chromatophobia ബാധിച്ചു ആക്രമികള്‍ ഭയന്ന് ഓടിപ്പോകും എന്ന് കൊച്ചമ്മ ധരിച്ചിട്ടുണ്ടാകും.

ഏതായാലും, ലേഡീസ് കമ്പാര്‍ട്ട്മെന്റ് ട്രെയിനിന്റെ മുന്നിലോ, നടുക്കോ, പിന്നിലോ ആക്കിയത് കൊണ്ടോ, അതിനു പിങ്കോ ചുവപ്പോ മഞ്ഞയോ വെള്ളയോ നിറം അടിച്ചതുകൊണ്ടോ ഒന്നും ഇത് മാറാന്‍ പോകുന്നില്ല. ഒരു കാരണം, ദീര്‍ഖദൂര ട്രെയിനുകളില്‍ പരസ്പരം ബന്ധിപ്പിച്ചിരിക്കുന്ന കമ്പാര്‍ട്ട്മെന്റുകള്‍ ആണ് ഉള്ളത്, അവയും സ്ലീപ്പറുകള്‍. അവയ്ക്കിടയില്‍, ചെറിയ ദൂരം മാത്രം കേരളത്തില്‍ സഞ്ചരിക്കുന്ന ഈ ട്രെയിനുകളില്‍ നടുക്ക് ഒരു കഷണം ജനറല്‍ കോച്ച് ഖടിപ്പിക്കുക പ്രായോഗികമല്ല. ദീര്‍ഖദൂര ട്രെയിനുകള്‍ ദീര്‍ഖ ദൂര യാത്രക്കാര്‍ക്ക് വേണ്ടിയുള്ളതാണ് എന്നുള്ളത് വേറെ കാര്യം. പിങ്ക് നിറത്തെപ്പറ്റി എനിക്കൊന്നും പറയാനില്ല.

കേരളത്തില്‍ സ്ത്രീകള്‍ക്ക് നേരെയുള്ള ആക്രമണങ്ങള്‍ വലിയ ഒരു സാമുഹ്യ പ്രശ്നത്തിന്റെ പുറമേ കാണപ്പെടുന്ന ലക്ഷണം മാത്രമാണ്. കേരളത്തിലെ പുരുഷന്മാരുടെ വികലമായ സ്ത്രീസങ്കല്‍പ്പം തന്നെ ആണ് സ്ത്രീകള്‍ക്കെതിരെ ഉള്ള ഈ ആക്രമണങ്ങള്‍ക്ക് കാരണം. സദാചാര പോലീസ് ചമയലും മറ്റും ഇതിന്റെ വേറെ ഒരു ആവിഷ്കരണം മാത്രം. ചെറുപ്പം മുതലേ സമപ്രായക്കാരായ പെണ്‍കുട്ടികളുമായി യാതൊരുവിധ ഇടപെഴകലും ഇല്ലാതെയാണ് മിക്ക ആണ്‍കുട്ടികളും വളരുന്നത്‌, തിരിച്ചും. ലിംഗ വിവേചനത്തിന് ഈറ്റവും പ്രാധാന്യം നല്‍കുന്ന കോണ്‍വെന്റ് വിദ്യാഭ്യാസ സമ്പ്രദായത്തിന്റെ പല രൂപങ്ങളും മറ്റുമാണ് ഇതിനു കാരണം എന്നാണു എനിക്ക് തോന്നുന്നത്. ഈ കുട്ടികള്‍ വളര്‍ന്നു വലുതാകുമ്പോള്‍ ശരീരത്തിന്റെ വ്യതിയാനങ്ങളില്‍ സംഭ്രമം നിറഞ്ഞു ആവശ്യമില്ലാത്ത വഴികളിലേക്ക് തിരിയുകയും ഞരമ്പ്‌ രോഗികളാകുകയും ചെയ്യുന്നു. ഇതിനെക്കുറിച്ച്‌ എഴുതാന്‍ തുടങ്ങിയാല്‍ ഇപ്പോഴൊന്നും തീരില്ല.

ഈ സാമുഹിക പ്രശ്നം അങ്ങനെ പെട്ടെന്നൊന്നും ഇല്ലാതാകാന്‍ പോകുന്നില്ല. ശക്തിയായ വിദ്യാഭ്യാസവും ശരിയായ വളര്‍ത്തുഗുണവും പിന്നെ സാമൂഹിക മനസ്തിതിയുടെ മാറ്റവും എല്ലാം ഇതിനു ആവശ്യമാണ്. അതുവരെ, ഒന്നേ ചെയ്യാനുള്ളൂ. വേണ്ടാതീനം കാണിച്ചാല്‍ ഇനി (കൈ) പൊങ്ങില്ല എന്ന അറിവ് എല്ലാവരുടെയും മനസ്സില്‍ കുത്തിക്കയറ്റുക. “ഷൂട്ട്‌ അറ്റ്‌ സൈറ്റ് ” ഒന്നും വേണ്ടെങ്കിലും, അതുപോലെ തന്നെ വളരെ ശക്തമായ നിയമനിര്‍മാണം കൊണ്ടുവരിക, ഗോവിന്ദച്ചാമി പോലെ പെട്ടെന്ന് വിധികള്‍ കല്‍പ്പിക്കുക. എല്ലാ ലേഡീസ് കമ്പാര്‍ട്ട്മെന്റുകളിലും സായുധരായ പോലീസുകാരെ നിയമിക്കുക തന്നെ വേണം. കളിയ്ക്കാന്‍ ചെന്നാല്‍ നല്ല കൊട്ടുകൊടുക്കാന്‍ കെല്‍പ്പുള്ളവര്‍. ആക്ക്രമണങ്ങള്‍ താനേ കുറയുന്നത് കാണാം.

പക്ഷെ, ഇത് പോര. പന്ത് ഇപ്പോഴും റെയില്‍വേയുടെ കോര്‍ട്ടില്‍ തന്നെയാണ്. ഒരു ട്രെയിനിലെ എല്ലാ യാത്രക്കാര്‍ക്കും പോലീസ് സംരക്ഷണം കൊടുക്കാന്‍ പറ്റില്ലല്ലോ. ടിക്കറ്റ്‌ ഇല്ലാത്ത യാത്രക്കാരെ പിടിക്കാന്‍ വല്ലപ്പോഴും ഒക്കെ കാണിക്കുന്ന ശുഷ്കാന്തി ഇപ്പോഴും കാണിക്കുകയും, ട്രെയിനുകളിലും റെയില്‍വേ പരിസരങ്ങളിലും മറ്റും ടിക്കറ്റ്‌ ഇല്ലാതെ അലഞ്ഞു തിരിഞ്ഞു നടക്കുന്നവരെയും ഭിക്ഷക്കാരെയും മറ്റും കര്‍ശനമായി നിയന്ത്രിക്കുകയും വേണം. ട്രെയിനിന്റെ നിലം തുടയ്ക്കുന്നവര്‍, ആസ് ബസ് ടോസ്‌ കഷണങ്ങള്‍ കൊട്ടി “പരദേശി പരദേശി” പാടുന്നവരെയും മറ്റു ഭിക്ഷക്കരെയും എല്ലാം ചവിട്ടിപ്പെറുക്കി പുറത്തെറിയുകയും യാതൊരു കാരണവശാലും അവരെ ട്രെയിനുകളുടെ അടുത്ത് പോലും ചെല്ലാന്‍ അനുവദിക്കാതിരിക്കുകയും ചെയ്യുക. എന്നാല്‍, ഈ ക്ലീനിംഗ് ഓപ്പറേഷന്‍ മാത്രം പോര. റെയില്‍വേയുടെ നടത്തിപ്പിലും ചില വ്യതിയാനങ്ങള്‍ വരുത്തണം. അതിനെക്കുറിച്ച് അടുത്ത ഭാഗത്തില്‍.

ഇതുപോലെ വൃത്തിയുള്ള ഒരു ട്രെയിന്‍ ഇന്ത്യയില്‍ സ്വപ്നം കാണാന്‍ എങ്കിലും പറ്റുമോ?

ടിന്റുമോന് ഒരിക്കല്‍ ഒരു (നോര്‍ത്ത് ഇന്ത്യന്‍) ഹിന്ദിക്കാരി ഗേള്‍ഫ്രെണ്ട് ഉണ്ടായിരുന്നു. പെണ്ണിന്റെ പേര് പായല്‍ (payal) എന്നായിരുന്നു. വളരെ സന്തോഷത്തോടെയാണ് അവര്‍ കഴിഞ്ഞിരുന്നത്. എന്നാല്‍ ഒരു ദിവസം ഏതോ കാരണത്താല്‍ രണ്ടു പേരും അടി കൂടി എന്നന്നേക്കും ആയി പിരിഞ്ഞു. ടിന്റുമോന് സഹിച്ചില്ല. അവന്‍ ആ വിഷമത്തില്‍ അന്ന് പോയി വെള്ളം അടിച്ചു വീലായി, സങ്കടം സഹിക്കാന്‍ വയ്യാതെ പാടാന്‍ തുടങ്ങി.

അടിച്ചു വീലായ ടിന്റുമോന്‍ പാടിയതെന്ത്?

“പായലേ വിട… പൂപ്പലേ വിട… എന്നന്നേക്കും വിട!!”

Thank you thank you.

കോപ്പിറൈറ്റ്: ഈ മഹാസംഭവം ആദ്യമായി കണ്ടുപിടിച്ചു ഉണ്ടാക്കിയെടുത്ത് ട്യൂണ്‍ ചെയ്തു പാടി റെക്കോര്‍ഡ്‌ ചെയ്തു റിലീസ് ചെയ്ത മഹാന്മാരായ സഹ കുടിയന്മാരെ، നിങ്ങളെ നമിച്ചു! നിങ്ങള്ക്ക് പ്രണാമം!

Featured here is the song “Vaattu Veena Mannil”, created to the tune of the song “Chora veena mannil” from the Malayalam movie Arabikkatha. This song was written created seperately and dubbed as “The Anthem of Drinkers”. Epic, as it is!

കഴിഞ്ഞ ദിവസം മനോരമയിലെ മുന്‍ പേജിലെ പ്രധാന വാര്‍ത്ത‍ കണ്ടു ചിരിച്ചു ചിരിച്ചു ഒരു വഴിയായി. നമ്മുടെ മാധ്യമങ്ങള്‍ ഹ്യുമര്‍ സെന്സ് ഇല്ലാത്തവരാണെന്ന് എന്ന് ഇനി ആരും പറയില്ല. അല്ലെങ്കില്‍ പിന്നെ മുന്‍ പേജിന്റെ കുറുകെ പടവലങ്ങ  അക്ഷരങ്ങളില്‍ ഇങ്ങനെ അടിച്ചു വയുക്കുമോ? “കേരളത്തിന്‌ അതിവേഗ റെയില്‍പാത! തിരോന്തരത്തൂന്ന് കണ്ണൂരേക്ക്‌ വെറും ഒന്നര മണിക്കൂറില്‍ മലയാളികള്‍ക്ക് പറന്നെത്താം!!”  ഹഹഹഹാ ഹയ്യോ ചിരി അടക്കാന്‍ കഴിയുന്നില്ലേ…  അച്ചായന്റെയും നമ്മുടെ നേതാക്കന്മാരുടെയും ഓരോരോ തമാശകളെ… ഹോ!

അല്ല എങ്ങനെ ചിരിക്കാതിരിക്കും. ഹൈ സ്പീഡ് റെയില്‍വേ പോലും. അതും കേരളത്തില്. നടന്നത് തന്നെ. നമുക്കൊക്കെ അറിയാം, എന്തൊക്കെ സംഭവിച്ചാലും കേരളത്തില്‍ നടക്കില്ലാത്ത, അല്ലെങ്കില്‍ നടക്കാന്‍ സമ്മതിക്കില്ലാത്ത ചില കാര്യങ്ങള്‍ ഉണ്ട്: വ്യവസായങ്ങള്‍ തുറക്കുക, ഇന്ഫ്രാസ്ടക്ചെര്‍ വികസന പ്രൊജെക്ടുകള്‍ നടപ്പിലാക്കുക, ആണും പെണ്ണും തമ്മില്‍ സ്വതന്ത്രമായി ഇടപെഴുകുക എന്നിങ്ങനെ. ഇപ്പോള്‍ ഉള്ള ഒരു റെയില്‍വേ പാളത്തിന് സമാന്തരമായി മറ്റൊരു റെയില്‍വേ പാളം സ്ഥാപിക്കാന്‍ പോലും കഴിയുന്നില്ല. പോട്ടെ, ഉള്ള ട്രെയിനുകള്‍ നേരെ ചൊവ്വേ ഓടിക്കാന്‍ പോലും കഴിയുന്നില്ല. അപ്പോഴാണ്‌ ഇവരൊക്കെ ഇതുപോലെ മണ്ടന്‍ പ്രസ്താവനകളുമായി വന്നു ഒരുമാതിരി ആളെ പൊട്ടനാക്കുന്ന പണി കാണിക്കുന്നത്. 

കേരളത്തില്‍ ഇതിന്റെ പേരില്‍ നടക്കാന്‍ പോകുന്ന സര്‍ക്കസ്സുകള്‍ എന്തെല്ലാം ആണെന്ന് പറയാതെ തന്നെ എല്ലാര്ക്കും അറിയാം. എന്നാലും, നമുക്ക് ഒന്ന് നോക്കാം.

ഹൈ സ്പീഡ് റെയിലിന്റെ പേരില്‍ നടക്കാന്‍ പോകുന്ന കോലാഹലങ്ങള്‍

• 10 വര്‍ഷത്തില്‍ 150 ഹര്‍ത്താലുകള്‍/ബന്ദുകള്‍.
• കണക്കില്ലാത്ത മാര്‍ച്ചുകള്‍, ധര്‍ണകള്‍, സമരങ്ങള്‍, ഉപരോധങ്ങള്‍.
• മേല്‍പ്പറഞ്ഞവയ്ക്ക് അകമ്പടി ആയി ലാത്തിച്ചര്‍ജുകള്‍, ആകാശത്തേക്കും അല്ലാതെയുമുള്ള വെടിവയ്പ്പുകള്‍.
• തിരുവനന്തപുരം മുതല്‍ കണ്ണൂര്‍ വരെ ഉദ്ദേശം 20 ”ഹൈസ്പീഡ് റെയില്‍ വിരുദ്ധ സമിതികള്‍” രൂപം കൊള്ളുന്നു.
• താന്താങ്ങളുടെ നിയോജകമണ്ടലങ്ങളില്‍ ഉള്ള സ്റ്റേഷനുകളില്‍ ഹൈസ്പീഡ് ട്രെയിനുകള്‍ക്ക് സ്റ്റോപ്പ്‌ അനുവദിക്കണം എന്ന് പറഞ്ഞു MLA മാര്‍, MP മാര്‍, ജനകീയ വേദി ചോട്ടാ നേതാക്കള്‍, വാര്‍ഡു മെമ്പര്‍മാര്‍ മുതലായവരുടെ സമര കോലാഹലങ്ങള്‍.

കേരളത്തെ നശിപ്പിക്കാനുള്ള ഹൈ സ്പീഡ് റെയില്‍ തുലയട്ടെ!

• പണക്കാര്‍ക്കും കുത്തക ബൂര്‍ഷ്വാ മുതലാളികള്‍ക്കും കേരളത്തിലുടനീളം തെക്ക് വടക്ക് അതിവേഗത്തില്‍ ഓടി കളിക്കാനുള്ള അവസരമൊരുക്കാന്‍ മാത്രം ആണ് ഹൈസ്പീഡ് റെയില്‍!
• ഹൈസ്പീഡ് റെയില്‍ ലൈന്‍ മുറിച്ചു കടക്കാന്‍ പറ്റില്ല, അതുകൊണ്ട് അത് കേരളത്തെ രണ്ടായി മുറിക്കും!
• പതിനായിരങ്ങള്‍ക്ക് തങ്ങളുടെ ഭൂമി, വീടുകള്‍ എന്നിവ നഷ്ടപ്പെടും. പ്രത്യേകിച്ചു പാവപ്പെട്ടവര്‍ക്ക് റെയില്‍ ലൈനിന് അപ്പുറത്തുള്ള തങ്ങളുടെ സ്ഥലങ്ങള്‍ എന്നന്നേക്കുമായി കൈവിട്ടു പോകും!
• ഹൈസ്പീഡ് റെയില്‍വേ ചൈനയില്‍ പരാജയം ആണ്. അതുകൊണ്ട് ഇവിടെ വേണ്ട.

ഹൈ സ്പീഡ് റയിലിനെ ചുറ്റിപറ്റി ഉയര്ന്നുവരാവുന്ന ആവശ്യങ്ങള്‍

• ചിറയിന്‍കീഴ്‌, വര്‍ക്കല, കരുനാഗപ്പള്ളി, തിരുവല്ല, വൈക്കം, അങ്കമാലി, പട്ടാമ്പി മുതലായ സ്ഥലങ്ങളില്‍ ഹൈസ്പീഡ് ട്രെയിനുകള്‍ക്ക് നിര്‍ബന്ധമായും സ്റ്റോപ്പ്‌ അനുവദിക്കണം.
• പിന്നോക്കവിഭാഗങ്ങള്‍ക്കും സാമ്പത്തികമായി അവശത അനുഭവിക്കുന്നവര്‍ക്കും ടിക്കറ്റ്‌ ചാര്‍ജില്‍ 50% സബ്സിഡിയും 50% സീറ്റ്‌ ക്വോട്ടയും അനുവദിക്കുക.
• ജനങള്‍ക്ക് യാത്ര സൗകര്യം അനുവദിക്കുക എന്നത് ഒരു സോഷ്യലിസ്റ്റ്‌ സര്‍കാരിന്റെ കടമ ആയതിനാല്‍ ടിക്കറ്റ്‌ ചാര്‍ജ് പൂര്‍ണമായും ഒഴിവാക്കാം. ടോള്‍ ചാര്‍ജുകള്‍ ഒഴിവാക്കുന്നതുപോലെ. ക്യൂബയിലോക്കെ അങ്ങനെയാണ്.
• അതീവ ജനസാന്ദ്രതയുള്ള സംസ്ഥാനം എന്ന നിലയ്ക്ക് കേരളത്തിന്‌ ‘പ്രത്യേക പരിഗണ’ നല്‍കി  ഹൈവേകള്‍ 30 മീറ്റര്‍ വീതി ആയി ചുരുക്കാന്‍ ആവശ്യപ്പെട്ടത് പോലെ സ്ഥലം പോകാതിരിക്കാന്‍ രണ്ടു റയില്‍ പാളങ്ങള്‍ക്ക് പകരം ഹൈ സ്പീഡ് റയിലിന് ഒരു പാളം മതി.

തെറ്റിദ്ധരിക്കരുത്. ഞാന്‍ വികസനത്തിന്‌ എതിരല്ല. ഈ ഡയലോഗ് ഏതൊരു വികസന വഴിമുടക്കിയും പറയുന്നതാനെന്നു എനിക്കറിയാം എന്നാലും  എന്നെ ആ കൂട്ടത്തില്‍ പെടുത്തരുത്. ഇത്രയും എഴുതിക്കൂട്ടിയത് തികച്ചും ഒരു cynic എന്ന നിലയില്‍ മാത്രമാണ് , ജനിച്ചകാലം മുതല്‍ ഇതുപോലെയുള്ള പൊള്ളയായ വാഗ്ദാനങ്ങള്‍ മുഖവിലക്കെടുത്ത് വിശ്വസിച്ചു ഒടുക്കം നിരാശനായ ഒരു cynic. ഓരോ പ്രാവശ്യവും ഇതുപോലെ ഓരോന്ന്  പ്രഖ്യാപിക്കുമ്പോള്‍ കണ്ണുകള്‍ വിടര്‍ത്തി, കാത് കൂര്‍പ്പിച്ചു ഞാന്‍ ഉള്‍പ്പെടെയുള്ള പൊതുജനം വളരെ പ്രതീക്ഷയോടെ വായും പൊളിച്ചു നോക്കിയിരിക്കും, “നമ്മുടെ നാടും പുരോഗമിക്കുന്നുണ്ട്” എന്ന് അഭിമാനത്തോടെ പറയാന്‍ പറ്റുന്ന ആ ദിവസവും നോക്കി. പക്ഷെ അവസാനം നിരാശമാത്രം ആയിരിക്കും ഫലം. ഇതിനുള്ള കാരണം എന്താണെന്ന് എല്ലാവര്ക്കും അറിയാം. ഈ നാട് നന്നായാല്‍ പലതും നഷ്ട്ടപ്പെടുന്ന ഒരുപാട് പേര്‍ ഇവിടെയുണ്ട്, സമ്പത്തും അധിക്കാരവും സ്വാധീനശക്തിയുമുള്ളവര്‍. തങ്ങളുടെ പലവിധത്തിലുള്ള താത്പര്യങ്ങള്‍ സംരക്ഷിക്കാന്‍ ഈത്തരത്തിലുള്ളവര്‍ സ്വാധീനവും പണവും സംഘടനാ ശക്തിയും ഉപയോഗിച്ച് പൊള്ള വരട്ടു വാദങ്ങളും ഇല്ലാത്ത മുരട്ടു ന്യായങ്ങളും നിരത്തി ഓരോ പുതിയ പദ്ധതിയും പ്രസ്ഥാനവും ഞെക്കിക്കൊന്നു കുഴിച്ചു മൂടി അതിനു മുകളില്‍ പനിനീര്  തളിക്കും. ഈ പ്രക്രിയ കാലാകാലങ്ങളായി തുടര്‍ന്നുകൊണ്ടിരിക്കുന്നു. കേരളത്തിന്‌  ലോകവ്യാപകമായി ദുഷ്പേരും മലയാളിക്ക് തലമുറകളായി ദുരിതവും മാത്രം മിച്ചം.

എത്ര എത്ര പദ്ധതികള്‍. മലയോര ഹൈവേ, തീരദേശ ഹൈവേ, പല എക്സ്പ്രസ്സ്‌ ഹൈവേകള്‍, സാധാരണ ഹൈവേകള്‍, ഫ്ലൈഓവറുകള്‍, സബരി റെയില്‍പാത, എരുമേലി റെയില്‍പാത, വിഴിഞ്ഞം പദ്ധതി, തലശ്ശേരി – മൈസൂര്‍, നിലമ്പൂര്‍ – നന്ച്ന്കോട്, തിരൂര്‍ – ഗുരുവായൂര്‍, തിരുവനന്തപുരം – കൊട്ടാരക്കര – ചെങ്ങന്നൂര്‍ റെയില്‍ പാതകള്‍, കോട്ടയം, ആലപ്പുഴ റെയില്‍പാതകളുടെ ഇരട്ടിപ്പിക്കല്‍, എണ്ണമറ്റ ഐ ടി പാര്‍ക്കുകളും സ്മാര്‍ട്ട്‌ സിറ്റികളും ഇന്‍ഫോ പാര്‍ക്കുകളും വ്യവസായ മേഖലകളും പിന്നെ കെ എസ് ആര്‍ ടി സിയും… ഇവയില്‍ മിക്കതും അകാല ചരമം അടഞ്ഞുകഴിഞ്ഞു, ബാക്കിയുള്ളവ പലതും ലൈഫ് സപ്പോര്‍ട്ടില്‍ കഴിയുന്നു. ആ പട്ടികയിലേക്ക് ചേര്‍ക്കാവുന്നതാണ് ഹൈ സ്പീഡ് റെയിലും.

ഇനി, സത്യമായ ഒരു സ്വപ്നം പോലെ ഇത് സത്യമായി എന്ന് വരട്ടെ. എന്താണ് സംഭവിക്കാന്‍ പോകുന്നത്? ബംഗ്ലൂരിലെ മെട്രോ പോലെ ഒരു കൌതുകവസ്തു ആയി ഇത്  അവശേഷിക്കും. ബാംഗ്ലൂര്‍ മെട്രോ ആദ്യ പാദത്തില്‍ ആണ് എന്നെങ്കിലും പറയാം. ഹൈ സ്പീഡ് റെയില്‍ നല്ല ആശയം ആണെങ്കിലും, മുട്ടിനു മുട്ടിനു വലിയ സ്റ്റേഷനുകള്‍ ഉള്ള, അവയില്‍ ഒക്കെ അതി ദീര്‍ഖദൂര ട്രെയിനുകള്‍ക്കുപോലും സ്റ്റോപ്പ്‌ ഉള്ള കേരളത്തില്‍ ഇത് എത്ര മാത്രം പ്രായോഗികമാകും എന്ന്  കണ്ടറിയണം. കാരണം, തിരുവനന്തപുരം – കണ്ണൂര്‍ നോണ്‍ സ്റ്റോപ്പ്‌ ആയി ഓടിക്കുന്നതില്‍ പ്രത്യേകിച്ച് അര്‍ഥം ഒന്നും ഇല്ലല്ലോ. ഈ റൂട്ടിലെ പ്രധാനപ്പെട്ട സ്ഥലങ്ങള്‍ തമ്മിലുള്ള ദൂരം നോക്കാം: തിരുവനന്തപുരം – കൊല്ലം 70 km, കൊല്ലം – കോട്ടയം – 90 km, കോട്ടയം – ഏറണാകുളം 60 km, ഏറണാകുളം – തൃശൂര്‍ 60 km, തൃശൂര്‍ – ഷോര്‍ണൂര്‍ 30 km, ഷോര്‍ണൂര്‍ – തിരൂര്‍ 50 km, തിരൂര്‍ – കോഴിക്കോട് 50 km, കോഴിക്കോട് – കണ്ണൂര്‍ 100 km. ഈ ദൂരങ്ങള്‍, പുതുതായി ഉണ്ടാക്കാന്‍ പോകുന്ന ലൈന്‍ കണക്കില്‍ എടുത്തു കൊണ്ടാണ്.

200 km സ്പീഡില്‍ ഓടുന്ന ട്രെയിനിന് എല്ലാ 50 കിലോമീറ്ററിലും ഒരു സ്റ്റോപ്പ്‌ എന്ന് ആവശ്യപ്പെടുന്നത് പോലും അതിന്റെ ഉദ്ദേശ്യത്തെ തകര്‍ക്കും. ഓരോ 15 – 20  മിനിറ്റിലും വണ്ടി നിര്‍ത്തേണ്ടി വരും. ഒരിക്കലും 150 കിലോമീറ്ററിന് മുകളില്‍ സ്പീഡ് എടുക്കാനും പറ്റും എന്ന് തോന്നുന്നുമില്ല. അല്ലെങ്കില്‍ എറണാകുളത്തും കോഴിക്കോടും മാത്രം ആയി സ്റ്റോപ്പുകള്‍ പരിമിതപ്പെടുത്തേണ്ടി വരും. പ്രശ്നം എന്ന് പറയേണ്ട കാര്യം ഇല്ലല്ലോ. അല്ലെങ്കില്‍ പിന്നെ ഇത് ബംഗ്ലുര്‍ക്കോ മദ്രാസിനോ നീട്ടേണ്ടി വരും. അതിനു എണ്ണമറ്റ ലോബികള്‍ സമ്മതിക്കുകയുമില്ല. അപ്പോള്‍ ഈ പദ്ധതിയും എപ്പോ വീര ചരമം അടഞ്ഞു എന്ന് ചോദിച്ചാല്‍ മതി. പൊതുജനം പിന്നെയും ശശി.

ദിവസവും 40 ട്രെയിനുകള്‍ ഓടുന്ന എറണാകുളം – കോട്ടയം - കായംകുളം ലൈന്‍ ഇരട്ടിപ്പിക്കല്‍ പ്രസ്ഥാനം 10 കൊല്ലം മുന്‍പ് തുടങ്ങിയതാണ്‌. 115 കിലോമീറ്ററില്‍ ഏതാണ്ട് 25 km ഈ 10 വര്ഷം കൊണ്ട് വിജയകരമായി പൂര്‍ത്തിയാക്കിയിരിക്കുന്നു. ഈ ഒറ്റ ലൈനില്‍ ഇനിയും കൂടുതല്‍ ട്രെയിന്‍ ഓടിക്കാന്‍ പറ്റില്ല എന്ന് റെയില്‍വേ. തിരുവനന്തപുരത്ത് ട്രെയിനുകള്‍ക്ക് പാര്‍ക്കിംഗ് സ്ഥലം ഇല്ലാത്തതിനാല്‍ കൂടുതല്‍ ട്രെയിന്‍ അനുവദിക്കാനും വകുപ്പില്ല. കൊല്ലം – ചെങ്കോട്ട ഗേജ് മാറ്റം എങ്ങും എത്തിയിട്ടില്ല. എറണാകുളം – ഷോര്‍ണൂര്‍ റൂട്ടില്‍ രണ്ടു പാളങ്ങള്‍ കൂടി ഉടന്‍ വേണ്ടി വരും. ഷോര്‍ണൂര്‍ – മംഗലാപുരം ലൈന്‍ ഇരട്ടിപ്പിക്കല്‍, വൈദ്യുതികരണം എന്നാ പേരിലൊക്കെ എന്തൊക്കെയോ കാലങ്ങളായി നടക്കുന്നുമുണ്ട്. 10 ലക്ഷം മലയാളികള്‍ തിങ്ങിപ്പാര്‍ക്കുന്ന ബംഗ്ലൂരില്‍ നിന്നും ഒരു ദിവസേന ട്രെയിന്‍ പോലും ഓടിക്കാനും പറ്റിയിട്ടില്ല. അങ്ങനെ മൊത്തത്തില്‍ കേരളം ഇന്നും സതേണ്‍ റെയില്‍വേ എന്ന് പറഞ്ഞു തമിഴന്‍ വല്ലപ്പോഴും തരുന്ന അപ്പകഷ്ണങ്ങല്‍ക്കായി തെണ്ടിക്കൊണ്ട് വായും പൊളിച്ചു ഇരിക്കുന്നു. അപ്പഴാണ് ഒരു ഹൈ സ്പീഡ് റെയില്‍!

ഉള്ള “ലോ ടെക്” ട്രെയിനുകള്‍ നേരെ ചൊവ്വേ ഓടിക്കുകയാണ് വേണ്ടത്. അതിനൊട്ടു പറ്റുകയുമില്ല, പിന്നെ അത് മറച്ചു വച്ച് ആളെ ശശി ആക്കാന്‍ വേണ്ടി “വായില്‍ തോന്നിയത് കോതക്ക് പാട്ട്” എന്ന രീതിയില്‍ ഓരോ പ്രസ്ഥാവനയിമായി ഇറങ്ങിക്കോളും, ഹൈ സ്പീഡ് റെയില്‍, തേങ്ങ മാങ്ങാ എന്നൊക്കെ പറഞ്ഞുകൊണ്ട്.

ദാ ധിപ്പോ ശരിയാകും. നോക്കിയിരുന്നോ.

(This post in available in English also. Click here)

(A cynical approach to the proposed plan of starting a high-speed railway line from Trivandrum to Kannur/Kasargod in Kerala, India, a state known for militant trade unionism and policies that thwart infrastructural development)

ഇന്നലെ കേരളത്തില്‍ നിയമസഭാ തിരഞ്ഞെടുപ്പ് നടന്നു. സാധാരണക്കാര്‍ ഒരു ദിവസത്തെ കൂലി കളഞ്ഞും കഷ്ടപെട്ടും വെയില്‍ കൊണ്ടും ക്യൂവില്‍ നിന്ന് ജനാധിപത്യ പ്രക്രിയ നടപ്പാക്കി. 75 % സമ്മദി ദായകര്‍ തങ്ങളുടെ വോട്ടു രേഖപ്പെടുത്തി. അഭിമാനിക്കാം.

അപ്പോഴാണ്‌ ഈ സംഭവം:

“സിനിമാതാരം കാവ്യ മാധവന്‍ വോട്ട് ചെയ്യാതെ മടങ്ങി”

എന്തേ? ആരെങ്കിലും അരുതാത്തത് വല്ലതും…?

ഇല്ല. അവരോടു പൊതുജനം ക്യൂവില്‍ നില്ക്കാന്‍ പറഞ്ഞു. അതാണ്‌ പ്രശ്നം. വീഡിയോ ഇവിടെ കാണാം: (നന്ദി, ഏഷ്യാനെറ്റ്)

വീഡിയോ ശ്രദ്ധിച്ചാല്‍ നാല് കാര്യങ്ങള്‍ വ്യക്തമാകും.

1. “ഞാന്‍ ഭയങ്കര പ്രാധാന്യം ഉള്ള VVIP ആണ്, കൂടിയ ഇനം, ഈ ആള്‍ക്കാരുടെ ഇടയില്‍ ക്യൂ നില്‍ക്കാണ്ടേ കാര്യമേ ഇല്ല” എന്നാ ഭാവത്തില്‍ അവര്‍ ഇടം വലം നോക്കാതെ നേരെ മുന്നില്‍ ചെന്ന് നില്‍ക്കുന്നു. – അഹങ്കാരം

2. കാവ്യയുടെ പുറകെ അച്ഛന്‍, അമ്മ, പരിവാരങ്ങള്‍ എന്നിവരും ക്യൂ ചാടാന്‍ റെഡി ആകുന്നു.

3. ഒരു ചെറുപ്പക്കാരന്‍ ഇവര്‍ ക്യൂ ചാടുന്നതിനെതിരെ പ്രതിഷേധിക്കുന്നു, അവര്‍ പിന്നോട്ട് മാറാന്‍ നിര്‍ബന്ധിതയാകുന്നു.

4 . “അഛാ, ഞാന്‍ അപ്പോഴേ പറഞ്ഞതല്ലേ..” എന്ന് പറയുന്ന കാവ്യ. ബാക്കി പറഞ്ഞത് ക്യാമറയില്‍ പതിഞ്ഞിട്ടില്ല. “…ഈ പരിപാടിക്ക് വരണ്ട എന്ന്” എന്നാണോ കാവ്യ ഉദ്ദേശിച്ചത്?

ബീവരിജെസ്-ല്‍ അല്ലാതെ മലയാളികള്‍ സാധാരണ ഒരിടത്തും ക്യൂ നില്‍ക്കാറില്ല. അപ്പൊ കുറച്ചു പേരും പ്രശസ്തിയും ഉള്ളവരുടെ കാര്യം പറയാനുണ്ടോ? പ്രത്യേകിച്ചും എവിടെ ചെന്നാലും ‘ആരാധകര്‍’ വളയുന്ന, ആവശ്യപ്പെടുന്ന എന്തും മുന്നില്‍ എത്തിച്ചു കിട്ടുന്ന സിനിമാതാരങ്ങള്‍? “ഞാന്‍ എന്തോ വലിയ സംഭവം ആണ്” എന്ന് ഇവര്‍ക്ക് തോന്നിപ്പോകുന്നത് സ്വാഭാവികം. “ക്യൂവില്‍ നില്‍ക്കണം” എന്ന ചെറിയ തോന്നല്‍ പോലും ഉണ്ടാകാത്ത ഇവരുടെ പെരുമാറ്റത്തെ ധാര്‍ഷ്ട്യം, അഹങ്കാരം എന്നൊക്കെ വേണമെങ്കില്‍ പറയാം. നിയമം അനുസരിച്ച് ക്യൂവില്‍ നില്‍ക്കുന്ന ആള്‍ക്കാര്‍ എല്ലാം എന്തേ, മണ്ടന്‍മാരാ? എല്ലാവരും “ഞാന്‍ ആളാണ്” എന്ന് ചിന്തിക്കാന്‍ തുടങ്ങിയാലോ?

കാവ്യേ, പ്രായമായവര്‍, രോഗികള്‍ എന്ന് വേണ്ട, ഇന്ത്യയുടെ പ്രതിരോധ മന്ത്രിക്ക് പോലും 30 മിനിട്ട് ക്യൂവില്‍ നിന്ന് വോട്ട് ചെയ്യാമെങ്കില്‍ നിങ്ങള്ക്ക് എന്ത് കൊണ്ട് ആയിക്കൂടാ? ഏതായാലും അദ്ദേഹത്തെക്കാളും ‘വലിയ’ ആളൊന്നും അല്ലല്ലോ നിങ്ങള്‍. വെയിലും പൊടിയും സഹിച്ചു അര ദിവസത്തെ ജോലിയും കൂലിയും കളഞ്ഞു ക്യുവില്‍ നില്‍ക്കുന്ന സാധാരണക്കാരന്റെ വിഷമം നിങ്ങളെ പോലെ ഉള്ളവര്‍ക്ക് മനസ്സിലാകുകയുമില്ല. വോട്ടു ചെയ്യുന്നിടത്ത് എല്ലാവരും തുല്യരാണ്. നിങ്ങള്‍ വെറും ഒരു സിനി ആര്‍ടിസ്റ്റ് മാത്രം ആണ്. ആ ക്യൂ വില്‍ ഉണ്ടായിരുന്ന ആര്‍ക്കുള്ളതിനെക്കളും വലിയ മഹത്വം ഒന്നും നിങ്ങള്ക്കില്ല. ഇവരുടെ വാല്പിടിച്ചു സാധാരണക്കാരന്റെ മെക്കിട്ടു കേറി ആളാകാന്‍ റെഡി ആയി നില്‍ക്കുന്ന  പരിവരങ്ങളുടെ  കാര്യം പറയുകയും വേണ്ട.

പിന്നെ, വോട്ട് ചെയ്യാതെ തിരിച്ചു പോകല്‍: ആര്‍ക്കും ഒരു നഷ്ടവും ഉണ്ടായില്ല കാവ്യേ. “എന്നെ പൊക്കിപ്പിടിച്ച് വലിയ ആളായി കാണാത്ത ഈ പൊതുജനങ്ങളുടെ ഇടയില്‍ നില്ക്കാന്‍ എന്നെ കിട്ടില്ല” എന്നാണ് ഭാവം എങ്കില്‍, ഇതേ “പൊതുജനങ്ങള്‍” ആണ് നിങ്ങളെ നിങ്ങള്‍ ആക്കിയത് എന്ന് ഓര്‍മിച്ചാല്‍ നല്ലത്. നാല് പടം അടുപ്പിച്ചു പൊട്ടിയാല്‍ തീരുന്നത്തെ ഉള്ളു നിങ്ങളുടെ ഈ ഗ്ലാമര്‍ ഒക്കെ. ജനത്തിനും സമൂഹത്തിനും യാതൊരു കാര്യവും ചെയ്യാതെ, നികുതി പോലും അടയ്ക്കാതെ ആളും ഗമയും കളിച്ചു നടക്കുന്ന നമ്മുടെ സിനിമാതാരങ്ങളെ അവര്‍ യഥാര്‍ത്ഥത്തില്‍ ഒന്നും അല്ല എന്ന് കാണിച്ചുകൊടുത്ത ആ ചെറുപ്പക്കാരന് അഭിനന്ദനങ്ങള്‍!

അവസാനം, ഇത്ര ഒക്കെ ആയിട്ടും അവരുടെ മറുപടി: “അയാള്‍ക്ക്‌ മാത്രമേ കുഴപ്പം ഉള്ളു” എന്നാണ്. എന്നിട്ടും അവര്‍ക്ക് മനസ്സിലായില്ലല്ലോ, അവര്‍ക്ക് ക്യൂ കട്ട് ചെയ്യാന്‍ തക്ക മഹത്വം ഒന്നും ഇല്ലെന്നു! കഷ്ടം!

മറ്റു പല അറബ് രാജ്യങ്ങളിലും എന്ന പോലെയല്ല ലിബിയയില്‍ നടക്കുന്ന പ്രശ്നങ്ങള്‍.  സ്വെച്ച്ചാധിപതിയായ ഗദ്ദാഫി, സമരം ചെയ്യുന്ന സ്വന്തം ജനത്തിനെതിരെ സൈന്യത്തെ അഴിച്ചു വിടുന്നതായിട്ടു റിപ്പോര്‍ട്ടുകള്‍, ഈ അരക്ഷിതാവസ്ഥ മുതലെടുത്ത്‌ നിയമവാഴ്ച തകര്‍ന്നു കൊള്ളയും കൊലയും എങ്ങും വ്യാപകം. എന്താണ് ഈ കലാപങ്ങളുടെ കാരണങ്ങള്‍ എന്നതിലെക്കൊന്നും ഈ പോസ്റ്റില്‍ കടക്കുന്നില്ല, പകരം അവിടെ കഴിയുന്ന ഇന്ത്യക്കാരെ കുറിച്ചാണ്.

ഇന്ത്യ സര്‍ക്കാര്‍, ലിബിയയില്‍ കുടുങ്ങിയ ഇന്ത്യക്കാരെ നാട്ടില്‍ എത്തിക്കാന്‍ ആവുന്നതെല്ലാം ചെയ്യുന്നുന്ടെന്നത് നല്ല കാര്യം! കഴിഞ്ഞ ദിവസം ആദ്യത്തെ ‘രക്ഷാ ഫ്ലൈറ്റില്‍’ ഡല്‍ഹി വഴി കൊച്ചിയില്‍ എത്തിയവരില്‍ ചിലര്‍ ലിബിയയില്‍ എന്താണ് നടക്കുന്നതെന്ന് വിവരിക്കുന്നത് മനോരമയില്‍ വായിച്ചു. ആകെ കൂടെ ഞെട്ടിപ്പിക്കുന്ന കഥകള്‍ ആണ് എല്ലായിടത്തും. “കൊള്ളസംഘങ്ങള്‍ എല്ലായിടത്തും”, “കൊള്ള എതിര്‍ക്കുന്നവരെ വെട്ടിനുറുക്കി കൊലപ്പെടുത്തുന്നു”,  “വെടിവയ്പ്പും തീവയ്പ്പും വ്യാപകം”. “ആളുകള്‍ വീടുകള്‍ക്കുള്ളില്‍ ഒളിച്ചു കഴിയുന്നു”, “കത്തി കഴുത്തില്‍ വച്ച് ഭീഷണിപ്പെടുത്തി” എന്നൊക്കെ. ചുരുക്കത്തില്‍ പറഞ്ഞാല്‍ ഭൂമിയിലെ നരകം, യുദ്ധക്കളം. അതിനു ശേഷം അവരില്‍ ഒരാള്‍ പറഞ്ഞത്രേ: “കാര്യങ്ങള്‍ താമസിയാതെ മെച്ചപ്പെടുമെന്നാണ് പ്രതീക്ഷ. അങ്ങനെയാണെങ്കില്‍ ഉടന്‍ തിരിച്ചു പോണം.” ഇതും കൂടി വായിച്ചപ്പോള്‍ ആശ്ചര്യവും അത്ഭുതവും തോന്നി. ഇത് പോലൊരു നരകത്തിലേക്ക് എന്തിനു അറിഞ്ഞുകൊണ്ട് തിരിച്ചു പോകണം?

Scene outside Tripoli Airport (Coutesy: Reuters)

ലിബിയ പോലൊരു രാജ്യത്ത് 31 വര്‍ഷമായി കഴിയുന്ന ഇന്ത്യക്കാര്‍, മലയാളികള്‍, ഉണ്ടെന്നു കേട്ടപ്പോള്‍ തന്നെ ആശ്ചര്യം തോന്നി. ലിബിയയെക്കുറിച്ച് മുന്‍പും കേട്ടിട്ടുള്ളതെല്ലാം ഭയപ്പെടുത്തുന്ന കഥകള്‍ മാത്രമാണ്. (ഇവിടെ വായിക്കു) അവിടുത്തുകാര്‍ക്ക് പോലും മനുഷ്യാവകാശങ്ങള്‍ ഇല്ല, ഭരണാധികാരികള്‍ ജനങ്ങളെ വേട്ടയാടുന്നു, പീഡിപ്പിക്കുന്നു, രാജ്യത്തെ കൊള്ളയടിക്കുന്നു, എന്നൊക്കെ. അങ്ങനെയാണെങ്കില്‍ വിദേശികളുടെ കാര്യം പറയാനുണ്ടോ? ശമ്പളം പോലും കൊടുക്കുന്നില്ലത്രേ.

ചോദ്യം ഇതാണ്: ഈത്തരത്തില്‍ അടിയറവു പറഞ്ഞു കഷ്ടപ്പെട്ട് ഇതിനാണ് അവിടെ കഴിയുന്നത്‌? സ്വന്തം രാജ്യത്ത് ഇപ്പോള്‍ അവസരങ്ങളുടെ കൂമ്പാരങ്ങള്‍ ആണ്. ഇന്ത്യ മാറിയ വിവരം ഇവര്‍ അറിഞ്ഞില്ലെന്നുണ്ടോ? അല്ലെങ്കില്‍ കുറേകൂടെ സ്വാതന്ത്ര്യവും ജീവിതസൌകര്യങ്ങളും അവകാശങ്ങളും ഉള്ള മറ്റു അറബ് രാജ്യങ്ങളിലെക്കെങ്കിലും മാറിക്കൂടെ? ഇനി ഉത്തര കൊറിയയില്‍ മലയാളികള്‍ ഉണ്ടെന്നു കേട്ടാല്‍ പോലും അതിശയം തോന്നില്ല.

ആരെയും വിധിക്കാന്‍ ഞാന്‍ ആളല്ല, അവരുടെ ഇഷ്ടം, അത് മാനിക്കുന്നു. എന്നിരുന്നാലും കൂടി മെച്ചപ്പെട്ട ജീവിത സൌകര്യങ്ങള്‍ വേറെ ഇടങ്ങളില്‍ ഉണ്ടെന്നിരിക്കെ, എന്തിനു സ്വയം ജീവിതം ഇങ്ങനെ ബലികൊടുക്കണം?

This post is available in English also (Click)

ഒരു കാക്ക അതിന്റെ കൂട്ടില്‍ ഒരു മുട്ട ഇട്ടു. എന്നാല്‍, മുട്ട കൂട്ടില്‍ നിന്ന് ഉരുണ്ട് താഴെ നിലത്തു വീണു. പക്ഷെ മുട്ട പൊട്ടിയില്ല! എന്തുകൊണ്ട്?

തുടക്കകാരന്റെ ഭാഗ്യം. (beginners luck )

കാക്ക വീണ്ടും കൂട്ടില്‍ ഒരു മുട്ട ഇട്ടു. മുട്ട കൂട്ടില്‍ നിന്ന് ഉരുണ്ട് താഴെ നിലത്തു വീണു. പക്ഷെ മുട്ട പൊട്ടിയില്ല! എന്തുകൊണ്ട്?

കഠിനാധ്വാനം (hard work)

കാക്ക പിന്നെയും മുട്ട ഇട്ടു. മുട്ട കൂട്ടില്‍ നിന്ന് ഉരുണ്ട് താഴെ നിലത്തു വീണു. പക്ഷെ മുട്ട ഇത്തവണയും പൊട്ടിയില്ല! എന്തുകൊണ്ട്?

പരിചയം (experience)

കാക്ക വീണ്ടും ഇട്ടു മുട്ട. മുട്ട കൂട്ടില്‍ നിന്ന് ഉരുണ്ട് താഴെ നിലത്തു വീണു. എന്നാല്‍  മുട്ട ഈ പ്രാവശ്യവും പൊട്ടിയില്ല! എന്തുകൊണ്ട്?

ഭയമില്ലായ്മ (not  afraid)

കാക്ക പിന്നെയും ഇട്ടു മുട്ട. കൂട്ടില്‍ നിന്നും ഉരുണ്ടു മുട്ട താഴെ വീണു. മുട്ട പൊട്ടിയില്ല! എന്തുകൊണ്ട്? എന്തൊകൊണ്ട്??

അഹങ്കാരം.

മുട്ട ഇട്ടു മടുത്ത കാക്ക വീണ്ടും ഇട്ടു മുട്ട. കൂട്ടില്‍ നിന്നും ഉരുണ്ടു താഴെ വീണ മുട്ട, ഈ തവണ പൊട്ടി! എന്തുകൊണ്ടിങ്ങനെ?

എല്ലാം ദൈവത്തിന്റെ വികൃതികള്‍…

അതുകൊണ്ട് ഒരു പ്രാവശ്യം പൊട്ടിയില്ല എന്ന് കരുതി അഹങ്കരിക്കരുത്! മുട്ട പോട്ടുവേ..

“പണമുണ്ടാക്കാന്‍ വേണ്ടി എത്ര പണം വേണമെങ്കിലും ചിലവാക്കാന്‍  പ്രത്യേകിച്ചും മലയാളി തയ്യാറാണ്!”

മനുഷ്യന്റെ ആത്യന്തിക ജീവിത ലക്‌ഷ്യങ്ങള്‍  തിന്നണം, കുടിക്കണം, ഉറങ്ങണം, ഇണ ചേരണം എന്നൊന്നുമല്ല. എങ്ങനെയെങ്ങിലും പണമുണ്ടാക്കണം എന്നണ്. ഒന്ന് ചിന്തിച്ചാല്‍, മുകളില്‍ പറഞ്ഞ കാര്യങ്ങള്‍ക്കും പണം വേണമല്ലോ. അത് അത്ര എളുപ്പം കിട്ടുന്ന സാധനവുമല്ല. കാശുണ്ടാക്കാന്‍ പാരമ്പര്യം, വിവാഹം, അതി കഠിനമായി അധ്വാനിക്കുക എന്നിങ്ങനെയുള്ള നേരായ വഴികളുണ്ട്, അതിനെക്കാളുമേറെ വളഞ്ഞ ഒരുപാട് വേറെ വഴികളുമുണ്ട്. പക്ഷെ, അതിനും കഷ്ടപ്പെടണം, അസാമാന്യ കഴിവും ധൈര്യവും വേണം. ‘അധ്വാനിക്കാതെ എളുപ്പത്തില്‍ എങ്ങനെ പണക്കാരനാകം’ എന്ന് ചിന്തിച്ചു ജന്മം പാഴാക്കുന്ന കുഴിമടിയനായ ആവറേജ് മലയാളിക്ക് ഇന്നൊന്നും പറഞ്ഞിട്ടുമില്ല. പിന്നെ? ഒരേ ഉത്തരം: ലോട്ടറി!

മലയാളികളുടെ രക്തത്തില്‍ അലിഞ്ഞു ചേര്‍ന്നതാണ് ലോട്ടറി. കേരളത്തില്‍, ലോട്ടറി ഒരു “സാംസ്കാരിക പ്രതിഭാസം” ആണ് എന്ന് വേണമെങ്കില്‍ പറയാം. സൈക്കളില്‍ ഒരു പലക മേലെ ടിക്കറ്റുകള്‍ അടുക്കി വച്ച് “നാളെ, നാളെ, നാളത്തെ കേരള” എന്ന അനൌന്‍സ്മെന്റുമായി കവലയിലും ബസ്‌ സ്റ്റാന്‍ഡിലും തെക്ക് വടക്ക് നടക്കുന്ന ‘ലോട്ടറിക്കാരന്‍’, കേരളത്തില്‍ ജനിച്ചു വളര്‍ന്ന ആരുടേയും ‘കുട്ടിക്കാല നൊസ്റ്റാള്‍ജിയയുടെ’ ഭാഗം പോലുമാണ്. ഒരു ‘ലോട്ടറി അടിച്ചിട്ട് വേണം ____ ഒന്ന് ചെയ്യാന്‍/സാധിക്കാന്‍” എന്ന ചിലരുടെ മനോഭാവം കണ്ടാല്‍, ലോട്ടറി അടിക്കുക എന്നത് ഭാഗ്യമല്ല, അവകാശമാണെന്ന് തോന്നിപ്പോകും. എങ്ങനെയെങ്കിലും കാശുണ്ടാക്കണം എന്ന ചിന്തയുടെ കൂടെ അധ്വാനിക്കുള്ള മലയാളിയുടെ വിമുഖതയും കൂടെ ആകുമ്പോള്‍ ലോട്ടറികള്‍ക്ക് ഹണിമൂണ്‍കാലം. പണമുണ്ടാക്കുക = ലോട്ടറി എന്ന് തന്നെയാണ് ചിന്താധാര. ലോട്ടറി ഇല്ലാത്ത കേരളത്തെക്കുറിച്ച് ചിന്തിക്കാന്‍ പോലും പലര്‍ക്കും പറ്റില്ല. അയല്‍ സംസ്ഥാനങ്ങളായ തമിഴ്നാട്, കര്‍ണാടക, ആന്ധ്ര എന്നിവയെല്ലാം ലോട്ടറി നിരോധിച്ചിട്ടും അത് കേരളത്തില്‍ നടക്കാത്തത് ഇതുകൊണ്ട് തന്നെ.

പച്ചക്കറി, കല്യാണചെറുക്കന്‍ മുതല്‍ സിനിമ മുതല്‍ ലോട്ടറി വരെ കേരളത്തില്‍ എന്നും അയല്സംസ്ഥാന ഐറ്റംസിനാണല്ലോ ഡിമാണ്ട്. എന്നിരുന്നാലും, സിക്കിമിലെയും ഭൂട്ടനിലെയും സര്‍ക്കാരുകള്‍ അടിച്ചിറക്കുന്ന, അല്ലെങ്കില്‍ അടിച്ചിറക്കുന്നു എന്ന് നമ്മളും അവരും വിശ്വസിച്ചിരുന്നതുപോലെയല്ല കാര്യങ്ങള്‍ എന്ന് ഈയിടെ മനസ്സിലാക്കിയെങ്കിലും, ആരും അത് കാര്യമാക്കാത്തിനു കാരണം ഈ ആര്‍ത്തി തന്നെ. തട്ടിപ്പ് ആണെങ്കിലും എങ്ങാനും അടിച്ചാലോ?

ഇത് ഒരു addiction കൂടിയാണ്, മദ്യപാനവും പുകവലിയും പോലെ. ചൂതാട്ടം (gambling) ചികിത്സ വേണ്ട ഒരു രോഗം തന്നെയാണ്. പക്ഷെ അതൊക്കെ ഇവിടെ പറയാന്‍ പറ്റുമോ? വിവരം അറിയും. അതുകൊണ്ട് പ്രിയപ്പെട്ട മലയാളികളെ, ലോട്ടറി എടുക്കു, എടുക്കു, അത് കഴിഞ്ഞു ബാക്കി വല്ലതും ഉണ്ടെങ്കില്‍ ഒരെണ്ണം അടിച്ചിട്ട് സിലസില ഹെയ് സിലസില എന്ന് പാടി, നാട്ടുകാരെയും തെറിവിളിച്ചു പോയിക്കിടന്നു ഉറങ്ങ്‌. നാളെ അടിച്ചാലും ഇല്ലെങ്കിലും, കൊള്ളും സംശയം വേണ്ട.

കഴിഞ്ഞ കുറച്ചു മാസങ്ങളായി ഒന്നിന് പിറകെ ഒന്നായി വെളിച്ചത്തു വന്നുകൊണ്ടിരിക്കുന്ന കേരളത്തിലെ ലോട്ടറിക്കച്ചവട സത്യങ്ങള്‍ പരിശോധിച്ചുനോക്കിയാല്‍, കേരളത്തില്‍ എന്തോ കാര്യമായ കുഴപ്പമുണ്ടോ എന്ന് സംശയിച്ചുപോകും. ഇതിനുള്ള കാരണങ്ങള്‍ പലതാണ്. അതിനു മുമ്പായി, ഈ ‘ലോട്ടറി തട്ടിപ്പ് വിവാദം’ കേരളത്തിലെ ‘അന്യസംസ്ഥാന ലോട്ടറിക്കച്ചവടത്തെ’ കുറിച്ച് നമ്മളെ ബോധ്യപ്പെടുത്തിയത്:

• അന്യസംസ്ഥാന ലോട്ടറിയുടെ നടത്തിപ്പ് ഫുള്‍ വെട്ടിപ്പാണ്.
• വലിയൊരു ശതമാനം ടിക്കറ്റുകളും വ്യാജമാണ്.
• ഈ ബിസിനെസ്സില്‍ ആരും നികുതി അടക്കുന്നില്ല.
• ഇനി അഥവാ ‘അടിച്ചാല്‍’ തന്നെ, സമ്മാനത്തുക നിങ്ങളുടെ കയ്യില്‍ കിട്ടണമെന്നില്ല.

ചുരുക്കത്തില്‍, ആരോ എവിടുന്നോ ടിക്കറ്റ്‌ അടിച്ചിറക്കുന്നു, ആരോ വിതരണം ചെയ്യുന്നു, വേറെ ആരോ വില്‍ക്കുന്നു, എവിടെയോ നറുക്കെടുപ്പു നടക്കുന്നു, ആര്‍ക്കൊക്കെയോ സമ്മാനം ലഭിക്കുന്നു (ഉണ്ടായിരിക്കാം). പൊതുജനം വെറുതെ പണം ലോട്ടറിക്കാരന് സംഭാവന കൊടുക്കുന്നു. (വ്യാജ ടിക്കറ്റുകളിലെ നമ്പറുകള്‍ എങ്ങനെയായാലും നറുക്കെടുപ്പില്‍ വരുന്നില്ലല്ലോ)

എല്ലാ തട്ടിപ്പ് കേസുകളിലും നടക്കുന്നതു പോലുള്ള പരസ്പര ആരോപണങ്ങളും വാക്പയറ്റുകളും പ്രസ്താവനമത്സരങ്ങളും ആരെയൊക്കെയോ ബോധ്യപ്പെടുത്താന്‍ ഉണ്ടെന്നു പോലെയുള്ള അന്വേഷണ-നടപടി-സസ്പെന്‍ഷന്‍ നാടകങ്ങളും എല്ലാം മുറപോലെ നടന്നു. എന്നാല്‍, ഇവിടെ അതിശയിപ്പിക്കുന്ന കാര്യം ഇതാണ്: കേരളം കണ്ടിട്ടുള്ള മറ്റു ‘പൊതുജന തട്ടിപ്പുകേസുകളില്’ നിന്നും വ്യത്യസ്തമായി (ആട്, ചിട്ടി, മാഞ്ചിയം, etc), ഈ വിവരങ്ങള്‍ എല്ലാം പുറത്തു വന്നിട്ടും ലോട്ടറികളുടെ വില്‍പ്പനയ്ക്ക് യാതൊരു കോട്ടവും വന്നിട്ടില്ല. കൂടിയിട്ടുണ്ടെങ്കിലേ ഉള്ളു. ഈ കാരണം കൊണ്ട് തന്നെ, യഥാര്‍ത്ഥ പ്രതികള്‍ തട്ടിപ്പ് നടത്തുന്നവരാണോ അതോ തട്ടിപ്പിനിരയായ പൊതു ‘കഴുത’ ജനമാണോ എന്ന് സംശയം തോന്നിപോകും.

ആദ്യം പറഞ്ഞത് പോലെ, കേരളത്തിലെ ‘പ്രബുദ്ധരായ’ ജനങ്ങള്‍ക്ക്‌ ഈ കാര്യത്തില്‍ കാര്യമായ എന്തോ കുഴപ്പമുണ്ട്. ഇത്രയധികം കോലാഹലമുണ്ടാക്കി  എല്ലാ മാധ്യമങ്ങളിലും ’അന്യസംസ്ഥാന ലോട്ടറികള്‍ തട്ടിപ്പാണ്’ എന്ന വാര്‍ത്തകള്‍ നിറഞ്ഞുനിന്നിട്ടും, ഇതിനെക്കുറിച്ച് എല്ലാം അറിഞ്ഞിട്ടും, ഇതൊന്നും നടക്കുന്നില്ല എന്ന് നടിച്ചു സാക്ഷരകേരളം പിന്നെയും അന്യസംസ്ഥാന ലോട്ടറികള്‍ വാങ്ങിച്ചു കൂട്ടി കയ്യിലുള്ള പണം വെറുതെ എറിഞ്ഞു കളയുന്നു. “ഞാന്‍ വെട്ടിപ്പിനിരയാവാന്‍ തയ്യാറാണ്” എന്ന് പറഞ്ഞു കാശുമായി ചെന്ന് നിന്ന് കൊടുത്താല്‍ പിന്നെ എന്ത് ചെയ്യും? കുറച്ചുനാള്‍ ഈ ലോട്ടറികള്‍ കിട്ടാതായപ്പോള്‍ ബ്ലാക്കില്‍ ഇവ വാങ്ങിക്കാന്‍ വന്‍ തിരക്കായിരുന്നത്രേ! കഷ്ടം!

കേരളത്തില്‍ ജനങ്ങള്‍ കുടിച്ചു നശിക്കുന്നു എന്ന് വിലപിക്കാന്‍ BBC മുതല്‍ ദീപിക വരെ എല്ലാവര്ക്കും ഭയങ്കര താല്പര്യമാണ്. എന്നാല്‍ ഈ വിപത്തിനെക്കുറിച്ച് പറയാന്‍ ഒരുത്തനുമില്ല. വെള്ളമടിച്ചാല്‍ തലയ്ക്കെങ്കിലും പിടിക്കും. ഇതോ? ഒരിക്കലും വരാത്ത പണത്തിനായി ശ്രമിച്ചു കയ്യിലുള്ള കാശും കൂടി വെറുതെ പോകുന്നു. എന്താണിതിനു കാരണം? ലോട്ടറി യുടെ അടി കൊള്ളാനായി കേരളം പുറം കാണിച്ചുകൊടുക്കുന്നതെന്തിനാണ്?

ഇതിനുള്ള കാരണങ്ങള്‍ വരുന്നു – ഭാഗം 2 വായിക്കുക

കേരളത്തില്‍ ഇന്ന് റോഡ്‌ ആണ് പ്രശ്നം. റോഡ്‌ ഉണ്ടങ്കിലെ വികസനം വരൂ എന്നതൊക്കെ പഴയ പ്രശ്നം. ഇന്നത്‌ ജീവിതപ്രശ്നമാണ്. ഇടുങ്ങിയ, പൊട്ടിപൊളിഞ്ഞ (ചിലയിടങ്ങളില്‍ ഇല്ലാത്തതുമായ) റോഡുകളും, കൊതുക് പോലെ സര്‍വത്ര പെരുകുന്ന വാഹനങ്ങളും പിന്നെ കയ്യേറ്റവും എല്ലാം ചേര്‍ന്ന് കേരളം ഇന്ന് മൊത്തത്തില്‍ ഒരു ‘ബ്ലോക്ക്‌ (ട്രാഫിക്‌ ജാം) പഞ്ചായത്ത്’ ആയി മാറിയിരിക്കുകയാണ്. ആളുകള്‍ റോഡില്‍ കുരുങ്ങി കിടന്നു ജീവിതത്തിന്റെ നല്ലൊരു ഭാഗം പാഴാക്കുന്നു. ആകെ ഉള്ള റോഡുകളില്‍ വാഹനങ്ങളെക്കാളും കൂടുതല്‍ കുഴികളും. ചില ഇടങ്ങളില്‍ റോഡുകള്‍ ഭൂമിയില്‍ നിന്നും അപ്രത്യക്ഷമായിരിക്കുന്നു. പകരം ചെളിവെള്ളം കെട്ടി കിടക്കുന്ന പാതാളക്കിടങ്ങുകളും ചിതറിക്കിടക്കുന്ന കല്ലുകളും മാത്രം..

ആകെ കൂടെ പാവക്കയുടെ വലിപ്പവും 4 കോടി ജനങ്ങളും ഉള്ള കേരളത്തില്‍ റോഡ്‌ എവിടെ ഉണ്ടാക്കാന്‍? എല്ലാവനും റോഡ്‌ വേണം, പക്ഷെ ഉണ്ടാക്കാന്‍ സ്ഥലം ഭൂമിയില്‍ ഇല്ല, ഉണ്ടെങ്കില്‍ത്തന്നെ കൊടുക്കത്തുമില്ല. റോഡിനു വീതി കൂട്ടുന്ന കഥ പറയുകയും വേണ്ട. എന്നാല്‍ പിന്നെ എക്സ്പ്രസ്സ്‌ വേ, ഫ്ലൈഓവര്‍ (മേല്‍പാലം) ഇതൊക്കെ ഉണ്ടാക്കി രക്ഷപ്പെടാമെന്ന്  വച്ചാലോ? അപ്പോഴും പ്രശ്നമാണ്. മേല്‍പാലം ഉണ്ടാക്കിയാല്‍ ഇപ്പോള്‍ താഴെ റോഡില്‍ മാത്രമുള്ള വാഹനങ്ങള്‍ ഒരു ലെവല്‍ കൂടെ മുകളിലും വരും, അതുകൊണ്ട് ഇപ്പോള്‍ താഴെ ഭൂമിയില്‍ മാത്രമുള്ള പുക, ശബ്ദം, പൊടി മുതലായവ കൊണ്ടുള്ള മലിനീകരണം ഒരു ലെവല്‍ മുകളില്‍ ആകാശത്തുകൂടെ ഉണ്ടാകും എന്നാണ് ‘മുകളില്‍ പിടിയുള്ളവര്‍’ പറയുന്നത്. അത് മാത്രമല്ല, മഴ ഭൂമിയില്‍ എത്തില്ല, കാശുള്ള ‘മുതലാളിമാര്‍’ ആകാശത്തുകൂടെ കാര്‍ ഓടിച്ചു രസിക്കും എന്നൊക്കെയുള്ള ജീവന്മരണ പ്രശ്നങ്ങള്‍ വേറെ. ഏതു നാട്ടിലും ഈവക ഇല്ലാത്ത കാര്യങ്ങള്‍ നിരത്തി ഏതു വികസന പ്രവര്‍ത്തനവും മുടക്കാന്‍ നാട്ടുകാര്‍, വ്യാപാരികള്‍, രാഷ്ട്രീയക്കാര്‍ എന്ന് വേണ്ട ധാരാളം ടീംസ് റെഡി. ഇങ്ങനെ പണിതീരാതെ നില്‍കുന്ന പല മേല്‍പ്പാലങ്ങളുടെയും അസ്ഥികൂടങ്ങള്‍ NH47 -ഇല്‍ അങ്കമാലിക്കും തൃശൂരിനും ഇടയില്‍ കാണാം.

അപ്പോഴാണ്‌ ഈ ഞെട്ടിക്കുന്ന വാര്‍ത്ത‍: മേല്പറഞ്ഞ NH47 -ഇല്‍, തൃശുരിനടുത്തു പുതുക്കാടില്‍ നാട്ടുകാര്‍ അവിടെ ഒരു മേല്‍പ്പാലം ലഭിക്കാന്‍ നിയമയുദ്ധം നടത്തി അതിനു അംഗീകാരം വാങ്ങിയിരിക്കുന്നു! (വാര്‍ത്ത‍ ഇവിടെ വായിക്കാം: ക്ലിക്ക്) പറഞ്ഞാല്‍ മനസ്സിലാകാത്ത അധികാരികള്‍ അനങ്ങാപ്പാറ നയം സ്വീകരിച്ചപ്പോള്‍ നാട്ടുകാര്‍ കോടതിയെ സമീപിക്കുകയായിരുന്നു. NH47 -ലെ പുതുക്കാട് ജംഗ്ഷനിലെ ഗതാഗതക്കുരുക്ക് പരിഹരിക്കാന്‍ മേല്‍പ്പാലം സഹായിക്കും എന്ന് ആര്‍ക്കും തര്‍ക്കമില്ല. ഇത് മനസ്സിലാക്കി ഇത്രയും കഷ്ടപ്പെട്ട് കോടതി വരെ പോയി ഇതിനു അംഗീകാരം വാങ്ങിച്ച നാട്ടുകാര്‍ക്ക് അഭിനന്ദനങ്ങള്‍! എല്ലായിടത്തും നാട്ടുകാരും അധികാര കസേരയില്‍ ഇരിക്കുന്നവരും ‘മുകളില്‍ പിടിച്ചു’ മുടന്തന്‍ ന്യായങ്ങള്‍ നിരത്തി ഏതു വിധേനയും വികസനം തടസ്സപ്പെടുത്തുന്ന നാട്ടില്‍ ഈ വാര്‍ത്ത‍ കേട്ടപ്പോള്‍ വിവരമുള്ളവര്‍ കേരളത്തിലുമുണ്ട്‌ എന്ന കാര്യമോര്‍ത്തു സന്തോഷം തോന്നി.

കുറച്ചു വര്‍ഷങ്ങള്‍ക്കു മുന്‍പ് കോട്ടയം ബേകര്‍ ജംഗ്ഷനില്‍ ഫ്ലൈഓവര്‍ പണിയണം എന്ന പ്രൊപോസല്‍ വന്നപ്പോള്‍ ‘ഫ്ലൈഓവര്‍ വിരുദ്ധ സമിതി’ ഉണ്ടാക്കിയ മഹാന്മാരെയാണ് ഈ വാര്‍ത്ത കേട്ടപ്പോള്‍ ഓര്‍മ്മ വന്നത്. ഈ മേല്‍പ്പാലം വന്നിരുന്നെങ്കില്‍ കോട്ടയം നഗരത്തിലെ ട്രാഫിക്‌ കുരുക്ക് എന്നെന്നേക്കുമായി ഇല്ലതായേനെ. ഈ പിന്തിരിപ്പന്മാരുടെ എതിര്‍പ്പ് മൂലം അത് നടക്കാതെ പോയി. കോട്ടയം ഇന്നും ഭീകരമായ കുരുക്കിന്റെ പിടിയില്‍ തന്നെ. ഒന്നെങ്കില്‍ ശുദ്ധ വിവരക്കേട് (മിക്കവാറും), അല്ലെങ്കില്‍ തന്റെ ഏതോ സ്വതാല്പര്യം ഹനിക്കപ്പെടുന്നു എന്ന വികല ചിന്തയായിരിക്കണം ഇത്തരം ‘യഥാര്‍ത്ഥ പിന്തിരിപ്പന്മാരുടെ’ പ്രവര്‍ത്തികള്‍ക്ക് പിന്നില്‍ എന്നാണ് എനിക്ക് തോന്നിയിട്ടുള്ളത്. രാഷ്ട്രീയം വേറെ. ഏതായാലും ഇതൊരു പുതിയ തുടക്കമാകും എന്ന് പ്രതീക്ഷിക്കുന്നു. ഏതെങ്കിലും വിവരദോഷികള്‍ വന്നു ആഗോളവല്‍കരണത്തിന്റെയും മുതലാളിതതിന്റെയും പേര് പറഞ്ഞു ഇത് മുടക്കുന്നതിന് മുന്‍പേ NHAI ഇത് പണി തീര്‍ക്കുമെന്നും പുതുക്കാട്ടുകാരെപ്പോലെ വേറെയും നാട്ടുകാര്‍ കേരളത്തില്‍ ഉണ്ടാകും എന്ന് പ്രതീക്ഷിക്കുകയും ചെയ്യുന്നു! മുദ്രാവാക്യങ്ങള്‍ മാറി എഴുതാന്‍ സമയമായിരിക്കുന്നു:

അഭിവാദ്യങ്ങള്‍, അഭിവാദ്യങ്ങള്‍! പുതുകാടുകാര്‍ക്ക് അഭിവാദ്യങ്ങള്‍!!

എക്സ്പ്രസ്സ്‌വേ സലാം!

Photo and News courtesy: Malayala Manorama: http://www.manoramaonline.com